Mar 5 | WEDTOPURA | STEP | Yesu ana tauvotaghotagho maitehi hi damana Galili topana au tupo gehauna, mepa mai Gerasa ravahi hi ma'ema'eyana.

Mark 5

Yesu aruwa-apoapoena oroto i ruiruiniya i hegari da i hopu.

(Mat 8:28-34; Luk 8:26-39)

1 Yesu ana tauvotaghotagho maitehi hi damana Galili topana au tupo gehauna, mepa mai Gerasa ravahi hi ma'ema'eyana. 2 Marainana Yesu wage'i i hopuhopu, oroto kokowagei i hopu'i. We'i orotona yamna aruwa-apoapoena ivi howa'i ma ivi taniwagei. 3 Egha tagotagogina da aiya'i ita vovai-hubai, mara maghamaghauna, tauhi aiena ma urana seiniyei hi raghiraghihi, wate mara anataputapuna hi raurau-seini ma seinihi i raurau-tuituinihi, aubaina egha tagotagogina da hita raghita dawai. Waguvarai da madeghai i mahimahirinae, i garagarara ma gha'imei i hapihapi meyei. Au oya ma au kokowaga i ma'ama'ae. 6 Oroto kokowagei tauna au uwama ma Yesu i inanai ma i ruba da au naona i pe'u. 7 Ma ponana ghaeghaene'i i garara, “Yesu, God au aidamo maemaema natuna, am ghohana awari'u aiwa'i? God wavanei, avivi baghaim, egha ma rau-ivi'apoapoye'u.” 8 We nana'arena i riwa, aubaina au naona Yesu aruwa-apoapoena i hegahegari da orotona ita hoputawane'i. 9 Yesu i rau-bayadei, “Wavam aiya'i?”

I paribeyana ipa, “Tauai a magha, aubaina a'u wava yamna Legion ^{▼▼5.9meaning a group of soldiers}.” 10 Tauna Yesu ivi bagha maeyei da tauhi ^{▼▼5:10aruwa-apoapoehi} havena da na'i dobuna hita hopu-tawane'i.

11 Au barabara, poro maghamaghauhi hi yabayaba, 12 aubaina aruwa-apoapoehi, Yesu hivi baghai hipa, “Ma pari-tawaneyai poro auwarihi da tauai, tauhi ana ruinihi.” 13 Yesu ivi aninehi, anina ma aruwa-apoapoehi, oroto hi hopu-tawane'i ma poro hi ruinihi. Porohi au aihariri hi ruba da Galili au topana hi harere. Tauhi maghauhi me 2000.

14 Tau-vighamoghamo, hi rovo ma hi ruba au meyagaigheha dobugheha da rava maghamaghauhi hi pari-verehi. Rava hi nae da aiwa'i i tuputupuwa hita inanai, 15 Marainana hi na'e Yesu awarina, tauna orotonana aruwa-apoapoehi hi riruiniya, yamna i tughutughura, gara i oteni ma ana nota ahi'ahina. Ma tauhi hi rovo kauwa. 16 Aiwa'i oroto ma aruwa-apoapoena da poro auwarihi i tuputupuwa, tau-inanahi, rava ghehauhi hi riwehi.

17 M tauhi Yesu hivi bagha'i da ahi dobu ita hopu-tawane'i.

18 Marainana Yesu i gerugeru au waga, orotona aruwa-apoapoena i ruiruiniya, Yesu ivi baghai da maiteni hita nae.

19 Yesu egha itavi aninei ma i riwei ipa, “Manaeme, am au numa ma am rava ma pariverehi, we'i kauwana ghaeghaena Bada i kaukauweiya tam aubaim ma tauna ana ivi ahiahi tam awarim.”

20 Anina ma orotona, tauhi ivo terehi ma i naeme au Dekapolis (meyaghai 10) ma meyagai maghamaghauhi i naenihi ma rava i pari-verehi, aiwa'i Yesu i kaukauweiya tauna awarina. Ma tauhi tau-rautanighana, hi bahei.

Jairus natuna ma wavine doridoriana ivi yawahanihi.

(Mat 9:18-26; Luk 8:40-56)

21 Yesu wage'i i damaname Galili topana au navanavagheha, marainana i damana vivira au navanavagheha, tauna yohora au geraha ma rava maghamaghauhi hi gariwabui. 22 Oroto tagogi i ne'i awarina, tauna ana wava Jairus ma tauna pari numana ^{▼▼5:22synagogue} tau pa'inina. Marainana tauna Yesu i inanai, i nae da au aiena i pe'u ma i rau-duneyei, 23 ma ivi baghaguratei, “Natu'u totopana i doria kauwa, mane'i da ma vodadani ma tauna ina yawahana ma ina ma'ae.”

24 Anina ma Yesu maiteni i na'e. Rava maghamaghauhi hi ne'i da hi gariu'umi.

25 Wavine ghehauna tara i doridoriei, borima 12 au horana, tauna maiteni kampa. 26 Wavinena money ghaeghaena i tawanei tau viyawahana ^{▼▼5:26doctors} auwarihi ma egha tagotagogina da hita hagu kauwei, doriana egha ita kwahakwaha ma i ra'ara'ata. 27 Tauna Yesu tuyeghana i nonori ma ivi mayavaina meyei ipa, “Ana gara ava ana vodadani, apo ana yawahana.” Yamna aubaina da wavinena rava maghamaghauhi horahiyei i nae da Yesu murine'i ana gara ivo dadani. 29 Mara tagogi tara doriana i kwaha ma tauna au horana mayana i vaina meyei da ana doria i kwaha. 30 Yesu mayana i vaini da ana boyaboya i hopu tawane'i, anina ma i maetavirei boru au pouhi ma ipa, “Aiya'i a'u gara ivo dadani?”

31 Ana tauvotaghotagho hipa, “Ma inana'i, we'i ravahi hi gariu'umim, yamna aubaina apo me mariwanei da aiya'i ivo dadanim?”

32 Ma Yesu i inana viravira, i ghoheghohei da na'i ravana ita inanai. 33 Wavinena i haramane'i da aiwa'i i tupuwa awarina ma i rovo kauwa da i tatatava. Anina ma i ne'i da Yesu au aena i pe'u ma aiwa'i anataputapuna riwa vaimahiei i riwana pahiyei. 34 Anina ma i riwei ipa, “Natu'u, am tumaghana awari'u, ivi yawahanim, am doria i kwaha nonowa. Nuwahubei ma nae.”

35 Yesu yohora i bababani ma, Jairus ana tau vituyetuyegha hi ne'i da hi riwei hipa, “Natum totopana i kwaha. Havena da tau viharaharamana utavi sinaviravirai?”

36 Tauhi aiwa'i hi ririweiya, Yesu egha itavi ponavowehi ma Jairus, i riwe'i ipa, “Egha marovo mavi tumaghane'u.” 37 Rava maghamaghauhi ivi ghaehi da hi ma'ae, Peter, James ma varehina John, tauhi ava i taravainihi ma hi nae. 38 Jairus ana au numa hi ghe'eta ma Yesu tauhi i inanahi da hivi nuwa ragharagha, hivivi nuwaboya ma hivivi touwana. 39 Yesu au numa i rui ma i riwehi ipa, “Aiwa'i aubaina o toutou? We'i teverana egha ita hiraghe, tauna e enoeno.”

40 Tauna, hi inana vai diboghi ma hivivi namei, yamna aubaina da tauhi ivi hopunihi ma teverana amana, ayona ma ana tauvotaghotagho tonugha i taravainihi ma hi rui teverana i enoenoyana. 41 Tevera au urana ivo wa ma i riwa ipa, “Talita koum,” anona yamna, “Totopa, ta'u a ririwem ma vomahiri.”

42 Tauna yaghiyaghina ava ivo mahiri ma i babaranae. (Tauna ana borima yamna 12) We'i ghohana hita inanai, yamna tauhi anataputapuhi hi ghohorihi. 43 Yesu ivi gha'anaghagharehi havena da, rava ghehauhi hita riwehi ma ipa, “Aiwa'i ona verei da ina am.”